ДЕНЕСКА Е СВ. АПОСТОЛ МАТИЈ: Со жрепка бил избран на местото на Јуда, проповедал и во Македонија

Апостол Матиј избран меѓу Дванаесеттемина

Православните верници денеска го одбележуваат празникот на Светиот апостол Матиј, еден од Дванаесеттемина големи Христови апостоли. Матиј бил роден во Витлеем и уште од младоста го следел Христовото учење, а по воскресението на Господ, апостолите со жрепка го избрале на местото на Јуда Искариотски. По слегувањето на Светиот Дух на Педесетница, тој започнал активно да го проповеда Евангелието. Според преданието, најпрво проповедал во Јудеја, а потоа и во Етиопија, каде што претрпел големи маки поради верата.

Преданието вели дека проповедал и во Македонија

Според црковното предание, Свети Матиј проповедал и во Македонија, каде што бил изложен на опасност од своите противници, но успеал да се спаси. Подоцна се вратил во Јудеја, каде што бил изведен пред првосвештеникот Анан и бестрашно сведочел за Христовата вера. Бил осуден на смрт и погубен, со што го завршил својот земен живот како маченик за Христос. Неговиот празник денес се одбележува како спомен на апостолот кој по Божја промисла го зазел местото на Јуда меѓу Дванаесеттемина.