МОН ЈА ПУШТИ „Е-НАУКА“: 229 истражувачи веќе се во националниот регистар

Министерството за образование и наука денеска го промовираше порталот „е-Наука“, единствен јавен електронски регистар на македонските истражувачи и научни организации. Во регистарот досега се внесени 229 истражувачи, чии профили содржат податоци за научните трудови, цитираноста, h-индексот, научното поле, образованието и институцијата во која работат. Платформата ги поврзува податоците со глобалните научни бази Web of Science, Scopus и Google Scholar.

Полесно поврзување на науката со бизнисот

Една од целите на „е-Наука“ е да се олесни поврзувањето на научниците со компаниите и институциите. Преку напредното пребарување, бизнисите ќе можат да пронајдат истражувачи според нивната област и да воспостават соработка за истражувачки, развојни и иновативни проекти. Порталот е отворен и за меѓународни универзитети и истражувачки центри за заеднички проекти и апликации за грантови.

Повик до сите македонски истражувачи

Министерката за образование и наука Весна Јаневска ги повика истражувачите од државните и приватните универзитети, научните установи, институтите и МАНУ да се регистрираат на платформата. Повикот се однесува и на самостојните истражувачи, како и на научниците со македонско потекло кои работат на странски универзитети. Во моментот на проверката, покрај 229 истражувачи, во регистарот се прикажани и 216 научно-истражувачки организации.