Три изложби во Скопје го чуваат споменот на Мајка Тереза и нејзината мисија

Фотографии, пораки и сведоштва за нејзиното дело

Во Спомен-куќата на Мајка Тереза во Скопје денеска ќе бидат отворени три изложби посветени на нејзиниот живот и дело. „Мирот започнува со насмевка“ е изложба составена од фотографии и инспиративни мисли на Мајка Тереза, со пораки за љубовта, човечноста и грижата за другите. Втората изложба, „Наследството на Мајка Тереза“, е дело на новинарката и волонтерка во редот на Мисионерките на љубовта, Патриција Морено Руиз-Олалде. Таа преку 29 фотографии и придружни текстови го пренесува своето волонтерско искуство и сведоштва од центрите на Мисионерките на љубовта.

Средби со познати личности од светската историја

Третата изложба, „Апостолот на мирот и љубовта преку зборовите на познатите“, прикажува фотографии од Мајка Тереза со бројни значајни личности. Меѓу нив се папата Јован Павле Втори, кралицата Елизабета Втора, принцот Чарлс, Далај Лама, Јасер Арафат и принцезата Дијана. Фотографиите се дополнети со нивни мисли и сведоштва за Мајка Тереза и нејзиното хуманитарно дело. Со трите изложби, Спомен-куќата уште еднаш го оживува споменот на скопјанката чија порака за мир, љубов и човечност остави силен белег во светот.