Маја Оџаклиевска се приклучува на „Macedonian All Stars“: Ќе пее со Хозе Карерас на 1 септември

Голем музички спектакл во Скопје

Македонската музичка легенда Маја Оџаклиевска ќе биде дел од големиот музички проект „Macedonian All Stars“ со светски познатиот тенор Хозе Карерас. Големиот концерт ќе се одржи на 1 септември на Плоштад Македонија во Скопје, со почеток во 20 часот. Влезот ќе биде бесплатен и отворен за сите граѓани. Настанот е дел од програмата за одбележување на 35 години независност на Македонија.

Македонски музички ѕвезди на една сцена

Покрај Оџаклиевска, на сцената ќе настапат и Миле Кузмановски, Сузана Спасовска, Наум Петрески, Каролина Гочева, Калиопи, Влатко Стефановски, Ана и Игор Дурловски. Македонскиот „дрим тим“ заедно со Хозе Карерас ќе приреди музичка вечер која, според најавата, ќе ги обедини сите генерации. Организаторите го најавуваат настанот како еден од најголемите музички проекти во историјата на Македонија.