АХВ ЗАПЛЕНИ ДВА ТОНИ НЕБЕЗБЕДНА ХРАНА ВО ЧЕНТО

Агенцијата за храна и ветеринарство (АХВ), во соработка со Комуналната инспекција на Град Скопје и Државниот пазарен инспекторат, заплени околу два тони небезбедна храна од различен вид на зелениот пазар во скопската населба Ченто. Акцијата била спроведена при инспекциска контрола насочена кон условите под кои се продава храната, како и почитувањето на законските прописи за нејзино безбедно складирање и промет. При контролата било утврдено дека храната се продавала надвор од местата предвидени за таа намена и во нехигиенски услови, со што се зголемувал ризикот за безбедноста и здравјето на потрошувачите.

АХВ – Запленетата храна е отстранета од промет

Запленетата храна е отстранета од промет, а надлежните инспекциски служби ќе продолжат со преземање мерки во согласност со законските надлежности. Од АХВ најавуваат засилени инспекциски контроли на пазарите, самостојно и во координација со другите надлежни институции, со цел заштита на здравјето на граѓаните и обезбедување безбедна храна.

Апел до трговците да ги почитуваат прописите

Агенцијата за храна и ветеринарство апелира до сите оператори со храна да ги почитуваат законските обврски и да обезбедат соодветни хигиенски услови при ракувањето, чувањето и продажбата на храната. Од АХВ посочуваат дека безбедноста на храната и заштитата на здравјето на потрошувачите остануваат приоритет во нивната работа.