АЛОНСО КУПИ УНИКАТЕН БУГАТИ ВЕЈРОН: За неговата изработка биле потребни повеќе од 20 тони алуминиум

Автомобилот е еден од најспецијалните примероци на Вејрон

Фернандо Алонсо се почести со уште еден исклучително редок и скап автомобил, откако го купи уникатниот Bugatti Veyron Grand Sport Vitesse. Автомобилот, кој носи број на шасија 8100, во еден период бил најскапиот произведен Вејрон. Неговиот прв сопственик побарал од Бугати да изработи специјална верзија со фрезирани алуминиумски панели на каросеријата, инспирирана од Veyron 16.4 Pur Sang. За изработката на каросеријата биле потребни повеќе од 20 тони алуминиумски блокови, при што секој панел бил фрезиран од еден блок. Полираната алуминиумска каросерија е комбинирана со внатрешност обложена со светлоцрвена кожа. Алонсо го презел автомобилот во Монако, а видео од моментот кога хиперавтомобилот го напушта салонот се појави на социјалните мрежи.

Шпанецот продолжува да ја збогатува колекцијата

И покрај неуспешната сезона во Формула 1, Алонсо очигледно ужива во автомобилите од највисоката класа. Во мај тој го купи и уникатниот Pagani Zonda Diamante Verde, чија вредност се проценува на повеќе од 10 милиони долари. Новиот Вејрон исто така има богата историја и повеќе детали изработени по специјална нарачка. Автомобилот претходно бил понуден на продажба од германскиот трговец Mechatronik, а сега е дел од колекцијата на двократниот светски шампион во Формула 1.