ГЕНЕРАЦИЈАТА Z ВРАЌА ТРЕНД ОД ПРЕД 20 ГОДИНИ: Старите дигитални фотоапарати повторно се во мода

Младите повторно ги бараат компактните фотоапарати

Старите компактни дигитални фотоапарати од почетокот на 2000-тите повторно стануваат популарни меѓу припадниците на генерацијата Z. Наместо технички совршени фотографии од паметните телефони, младите сè почесто ја избираат препознатливата естетика со директен блиц, заматено движење и пониска резолуција. Трендот е особено забележлив на забави, летувања и вечерни дружења, каде малите фотоапарати повторно се користат за спонтани снимки. За младите, ваквите фотографии имаат повеќе карактер и подобро ја пренесуваат атмосферата од моментот.

Бунт против совршените фотографии од телефоните

Популарноста на старите фотоапарати се толкува и како отпор кон претерано обработените и „испеглани“ фотографии што ги создаваат современите телефони. Генерацијата Z ги пребарува старите фиоки и интернет-огласите во потрага по уреди кои порано ги користеле нивните родители или постари членови од семејството. Дополнителна привлечност е тоа што фотоапаратот служи само за фотографирање, без известувања, апликации и постојано проверување на социјалните мрежи. Така, предметот кој пред две децении беше секојдневие денес повторно се враќа како моден детаљ и симбол на носталгијата по почетокот на 2000-тите.