ГОРИВАТА ВО ЕУ ПОСКАПИЈА ЗА 13,7 ОТСТО: Дизелот и бензинот поевтиниле во однос на мај

Цените и натаму повисоки од минатата година

Возачите во Европската Унија во јуни плаќале помалку за бензин и дизел отколку во мај, но цените и натаму биле значително повисоки во споредба со истиот период минатата година. Според податоците на Евростат, горивата и мазивата за личен транспорт биле за 13,7 отсто поскапи отколку во јуни 2025 година. Сепак, годишниот раст забавил во споредба со април, кога изнесувал 20,8 отсто, и со мај, кога достигнал 20,7 отсто. Цените пораснале во сите земји членки на Европската Унија, но со побавно темпо во споредба со претходниот месец.

Најголемо поскапување во Бугарија

Најголемиот годишен раст е регистриран во Бугарија, каде што горивата биле поскапи за 26 отсто. Потоа следуваат Литванија со раст од 23,5 отсто, Романија со 23,1 отсто, Финска со 22 отсто и Луксембург со 20,7 отсто. На месечно ниво, просечната цена на дизелот во ЕУ се намалила за 6,4 отсто, додека бензинот поевтинил за 4,2 отсто. Дизелот поевтинил во сите членки, а најголем пад бил забележан во Чешка, Полска и Бугарија. Кај бензинот, раст на цените во споредба со мај бил регистриран единствено во Кипар и Италија.