ИРАН СО ПРЕДУПРЕДУВАЊЕ ДО БУГАРИЈА: Не дозволувајте вашата територија да се користи против нас

Техеран испрати јасна порака до Софија

Иран упати официјално предупредување до Бугарија, повикувајќи ги властите да не дозволат нејзината територија да биде искористена за американски воени операции против Техеран. Предупредувањето доаѓа откако бугарскиот парламент одобри привремено распоредување на до осум американски авиони-цистерни KC-135 и околу 250 американски војници во воздухопловната база Безмер, во периодот од 24 јули до 1 октомври.

Портпаролот на иранското Министерство за надворешни работи, Есмаил Багаеи, порача дека секоја активност што ќе ги олесни американските напади врз Иран ќе се смета за соучесништво во, како што рече, „агресија и воени злосторства“. Тој ја повика Бугарија да не стане „соучесник на агресорите“.

Бугарија: Станува збор за логистичка поддршка

Бугарските власти нагласуваат дека од нивна територија нема да се изведуваат борбени операции и дека американските авиони ќе бидат користени исклучиво за воздушно дополнување со гориво во рамките на сојузничките обврски на НАТО. Министерот за одбрана истакна дека не се распоредува офанзивно вооружување и дека САД дале гаранции за минимизирање на безбедносните ризици.

Одлуката предизвика политички реакции и во самата Бугарија, додека предупредувањето од Иран дополнително ги зголеми тензиите во период на влошени односи меѓу Техеран и Вашингтон.