КАМЕРИТЕ НА „СЕЈФ СИТИ“ СТАВЕНИ ВО ФУНКЦИЈА ВО ДЕБРЦА: Наскоро системот стартува и во Охрид

По успешно завршеното финално тестирање, во функција се ставени камерите од системот „Безбеден град“ на автопатската делница меѓу селата Горенци и Требеништа во Општина Дебрца. Од Министерството за внатрешни работи информираат дека системот наскоро ќе почне да работи и на сообраќајниците во Охрид и поширокиот регион. Камерите во Охрид веќе се поставени, а во тек се нивната техничка проверка и завршното тестирање.

Поедноставно откривање на прекршоците

Со воведувањето на системот се очекува поефикасен и континуиран надзор на сообраќајот. Камерите треба да овозможат полесно откривање на прекршоците и да придонесат за подобрување на сообраќајната дисциплина. Според МВР, примената на „Безбеден град“ треба да ја зголеми безбедноста на патиштата и да влијае врз намалувањето на бројот на сообраќајни незгоди.

МВР со апел до возачите

Од Министерството апелираат до сите учесници во сообраќајот доследно да ги почитуваат правилата и прописите. Возачите се повикуваат со одговорно однесување да придонесат за побезбедни патишта. По завршувањето на техничките проверки се очекува камерите да бидат активирани и низ Охрид и околината.