МАКЕДОНИЈА СКОКНА 29 МЕСТА НА ГЛОБАЛНИОТ ИНДЕКС: Сега е 30-та во светот по сајбер-безбедност

Значителен напредок во сајбер-безбедноста

Македонија бележи значителен напредок на Глобалниот индекс за сајбер-безбедност, со скок од 29 позиции и пласман на 30. место меѓу 155 рангирани држави и територии. Земјата има резултат од 84,17 од можни 100 поени, со што е вброена меѓу државите со високо ниво на подготвеност за спречување и справување со сајбер-закани. Индексот ја оценува подготвеноста преку 49 индикатори во 12 области, меѓу кои законската рамка, заштитата на критичната инфраструктура, образованието и одговорот на сајбер-инциденти. Македонија има максимални оценки во повеќе од овие области, вклучително и заштитата на личните податоци и борбата против компјутерскиот криминал.

Андоновски: Реформите носат резултати

Министерот за дигитална трансформација Стефан Андоновски оцени дека скокот од 29 позиции претставува меѓународна потврда за спроведените реформи. Тој посочи дека во изминатиот период е воспоставена појасна институционална одговорност, современа законска рамка и посилни механизми за заштита на критичната инфраструктура. Меѓу чекорите се издвојуваат новиот Закон за безбедност на мрежни и информациски системи, Стратегијата за сајбер-безбедност 2025–2028 и Акцискиот план за нејзино спроведување. Министерството најавува дека ќе продолжи со јакнење на националните капацитети, развој на стручниот кадар и продлабочување на меѓународната соработка.