МОК ЈА УКИНУВА ЗАБРАНАТА: Руските спортисти се враќаат на Олимписките игри во Лос Анџелес

Меѓународниот олимписки комитет ја укинува забраната за Рускиот олимписки комитет, со што се отвора патот руските спортисти да се натпреваруваат на Олимписките игри во Лос Анџелес во 2028 година.

Одлуката доаѓа по период во кој руското знаме и химна беа отсутни од олимписките натпревари, а само ограничен број руски спортисти можеа да настапуваат под неутрален статус.

Од МОК соопштиле дека се задоволни што Рускиот олимписки комитет не работи на четирите спорни територии што Русија се обидува да ги анектира. Истовремено, Комитетот нагласува дека продолжува да ја поддржува Украина и дека останува против конфликтот.

Претседателката на МОК, Кирсти Ковентри, порача дека целта е сите спортисти да имаат можност да учествуваат на Олимписките игри и дека тие не треба да бидат одговорни за постапките на нивните влади.

Одлуката беше поздравена од рускиот министер за спорт Михаил Дегтјарев, кој оцени дека ова е „зелено светло“ за меѓународните федерации да ги вратат правата на руските спортисти.

И покрај укинувањето на забраната, МОК најави дека нема да организира настани во Русија, ниту ќе поканува руски владини претставници на своите натпревари.