ОХРИД ЈА ЧЕКА ОДЛУКАТА НА УНЕСКО: Следната недела ќе се знае дали регионот ќе ја избегне „црната листа“

Идниот статус на Охридскиот Регион ќе биде појасен следната недела, по Генералното собрание на УНЕСКО што ќе се одржи во Јужна Кореја. Вицепремиерот и министер за транспорт Александар Николоски изјави дека е оптимист оти регионот ќе го задржи статусот на светско наследство и нема да биде ставен на листата на загрозени подрачја. Тој посочи дека Владата води „силна битка“ во комуникацијата со земјите членки на УНЕСКО и дека во Македонија биле донесени над 10 амбасадори од земји членки на организацијата. Според Николоски, кај амбасадорите имало согласност дека Охридскиот Регион има исклучителна универзална вредност и претставува богатство не само за Македонија, туку и за целото човештво.

Охрид под строг надзор

Регионот на Охрид веќе е под строг надзор на УНЕСКО, а како главни проблеми се наведуваат дивоградбите и загадувањето. Државата испратила извештај за заштита на регионот, а доколку проблемите не се решат, постои ризик Охрид да биде ставен на листата на загрозено светско наследство. Николоски нагласи дека е потребна силна прекугранична соработка со Албанија, особено во делот на заштитата на Охридското Езеро и целиот регион.

Автопатот кон Ќафасан останува во игра

Николоски се осврна и на автопатската делница Требениште – Струга – Ќафасан, која е дел од договорот со „Бехтел и Енка“. Според него, по посетата на Мисијата на УНЕСКО, веќе не е прашање дали автопатот ќе се гради, туку која траса ќе биде избрана. Тој оценува дека тоа е позитивен сигнал, бидејќи проектот ќе продолжи, но со внимание кон заштитата на природното и културното наследство.