ПОКРИЕНИ СЕ МЕТАЛНИТЕ РЕШЕТКИ: Заврши првата фаза од заштитата на Македониумот

Со поставување плексигласна заштита врз привремено монтираните метални решетки заврши првата фаза од заштитата на споменичниот комплекс „Македониум“ во Крушево. Плексигласот треба да ги покрие решетките и да обезбеди дополнителна привремена заштита на објектот. Активностите следуваат по реакциите во јавноста што ги предизвика поставувањето на металната конструкција на културниот споменик.

Се подготвува проект за автентична реконструкција

Паралелно со привремените мерки, во тек е изработка на проект за целосна и автентична реконструкција на Македониумот. Целта е значајниот споменик да биде трајно заштитен и обновен со зачувување на неговиот оригинален изглед. Засега не се објавени повеќе детали за роковите во кои треба да започне и да заврши целосната реконструкција.

Поправено е и осветлувањето

Во рамки на активностите бил уреден и просторот околу споменичниот комплекс. Поправено е осветлувањето, па Македониумот повторно е осветлен и видлив во текот на ноќта. Споменикот „Илинден“, попознат како Македониум, е еден од најпрепознатливите симболи на Крушево и на македонската историска и културна меморија.