ПОЖАРНИКАРИТЕ НЕ СПИЕЈА 33 ЧАСА: Изгаснати пожарите во повеќе села во Битолско

Огнената стихија ставена под контрола

По повеќе од 33 часа непрекината борба со огнената стихија, пожарникарите од ТППЕ Битола ги изгаснаа пожарите кои зафатија повеќе села во општините Могила, Новаци и Битола. Екипите беа на терен во исклучително тешки услови, со високи температури и сува вегетација кои дополнително го отежнуваа гаснењето. Пожарите се закануваа да се прошират кон населени места и земјоделски површини, поради што пожарникарите интервенираа на повеќе критични точки. Благодарение на нивната истрајност и брзата реакција, огнот е ставен под контрола и е спречено негово понатамошно ширење.

Повеќе од еден ден на терен

Пожарникарите од ТППЕ Битола повеќе од еден ден се бореа со пожарите, со што уште еднаш се покажа колку е важна нивната улога во вакви критични ситуации. И покрај локализирањето, теренот ќе продолжи да се контролира поради можноста од повторно активирање на жариштата. Сувото време, високите температури и ветерот остануваат сериозна опасност за појава и ширење на нови пожари. Надлежните апелираат до граѓаните на максимална внимателност и да не преземаат активности кои можат да предизвикаат нови пожари.