РЕЧИСИ ЦЕЛА МАКЕДОНИЈА ПОД ВИСОК РИЗИК ОД ПОЖАРИ: Шест активни жаришта низ државата

 Шест активни жаришта низ државата

Речиси целата територија на Северна Македонија денеска се наоѓа во зона со висок ризик од пожари, а истовремено низ земјата се активни шест пожарни жаришта. Според метеоролошкиот индекс на пожар, најголем дел од државата е обоен во портокалова зона, што означува висок ризик од појава и брзо ширење на пожари на отворен простор и во шуми. Исклучок се Шар Планина и околината на Охрид и Ресен, каде е регистриран среден ризик, односно жолта зона.

Апел за максимална внимателност

Од Центарот за управување со кризи предупредуваат дека временските услови создаваат можност пожарите да се развиваат со висок интензитет, додека надлежните служби се справуваат со шест активни жаришта низ државата. Граѓаните се повикуваат на максимална внимателност, особено при престој во природа, бидејќи и најмала невнимателност може да предизвика сериозен пожар. Се апелира да не се пали оган на отворен простор и веднаш да се пријави секој забележан пожар на телефонскиот број 112.