САШО КЛЕКОВСКИ ИЗБРАН ЗА НОВ МИНИСТЕР ЗА ЗДРАВСТВО: Досега раководеше со Фондот за здравствено осигурување

Собранието го избра Сашо Клековски за нов министер за здравство, како кандидат предложен од ВМРО-ДПМНЕ. Неговиот избор е дел од реконструкцијата на Владата, во чии рамки беа избрани повеќе нови министри. Клековски на министерската функција доаѓа од позицијата директор на Фондот за здравствено осигурување.

Од Фондот за здравство на министерска позиција

Клековски дипломирал на Медицинскиот факултет при Универзитетот „Св. Кирил и Методиј“ во Скопје, а завршил и МБА академска програма на Универзитетот „Американ колеџ“ – Скопје. Од 2007 до 2010 година бил прв копретседател на Заедничкиот консултативен комитет на граѓанското општество меѓу Европската Унија и Македонија. Во периодот од 2013 до 2016 година предавал Претприемнички финансии на МБА-студиите на УАЦС.

Искуство во граѓанскиот и јавниот сектор

Во својата професионална биографија Клековски има учество во подготовката на повеќе национални стратегии, меѓу кои и првата владина стратегија за соработка со граѓанскиот сектор. Учествувал и во активности за зајакнување на капацитетите на институции како Народниот правобранител и Комисијата за спречување и заштита од дискриминација. Од 2012 до 2024 година бил колумнист во весникот „Нова Македонија“, а свои ставови објавувал и на блогот „Меѓутоа“.