УКРАИНСКИ СИЛИ ПОГОДИЈА РУСКА РАФИНЕРИЈА: Целта била на 1.000 километри од фронтот

Нападнат објект во Самарската област

Украинските одбранбени сили извршиле напад со долг дострел врз рафинеријата во Новокујбишевск, во руската Самарска област, соопшти украинскиот претседател Володимир Зеленски. Објектот се наоѓа на околу 1.000 километри од линијата на фронтот, а според Киев, нападот бил насочен кон намалување на руските приходи од извозот на енергенси и ограничување на воениот потенцијал на Москва. Нападот е дел од пошироката украинска стратегија за таргетирање на руската енергетска и индустриска инфраструктура. Во истото деноноќие, според украинските власти, биле погодени и други руски цели.

Киев објави и други погодени цели

Зеленски соопшти дека украинските сили погодиле и логистички центар во Самарската област, како и воени позиции во Црното Море. Киев истовремено објави резултати од претходни операции, меѓу кои и уништување на руски борбен авион Су-24М на аеродромот Саки на Крим. Украинските власти наведуваат дека нападите имаат цел да го намалат рускиот воен и економски потенцијал.