(ВИДЕО) Двајца загинаа во судир на противпожарни хеликоптери во Грција

Двајца членови на екипажите загинаа во тешка воздушна несреќа во Грција, откако два противпожарни хеликоптери од типот „Бел“ се судрија за време на гаснењето на големиот шумски пожар кај Псата, западно од Атина. Во леталата имало вкупно четворица мажи – двајца романски пилоти и двајца грчки навигатори. Според објавените информации, животите ги загубиле еден романски пилот и еден грчки навигатор, додека другите двајца членови на екипажите биле спасени.

Едниот хеликоптер се урнал по судирот

Несреќата се случила додека хеликоптерите летале на мала височина над подрачјето зафатено од огнената стихија. По судирот, едното летало се урнало, додека вториот хеликоптер успеал да исфрли вода и безбедно да слета. На социјалните мрежи е објавено вознемирувачко видео на кое се гледа моментот кога двете летала се доближуваат и се судираат во воздух. Официјалната причина за несреќата сè уште не е соопштена, а околностите треба да бидат утврдени со истрага.

Пожарот уништи повеќе од 100 куќи

Хеликоптерите биле ангажирани во гаснењето на еден од најголемите пожари што ја зафатија Грција во последните денови. Огнот во регионот на Псата уништил повеќе од 100 куќи, додека силниот ветер го отежнувал гаснењето и ширењето на пожарот. Властите издале наредби за евакуација на повеќе населени места, а во борбата со огнената стихија биле вклучени бројни пожарникари и воздушни единици.