Регион
Дознај прв
ЕДЕН ЅИД, ДВЕ ГЕРМАНИИ, ЕДНА ИСТОРИСКА НОЌ: Како падна Берлинскиот ѕид
На 9 ноември 1989 година падна Берлинскиот ѕид, симболот на поделена Европа. Историскиот настан го отвори патот за обединувањето на Германија.
На 9 ноември 1989 година се случи еден од најзначајните настани во современата европска историја – падот на Берлинскиот ѕид, симболот на поделбата меѓу Истокот и Западот. По речиси три децении разделеност, илјадници Берлинчани излегоа на улиците за повторно да се сретнат со своите семејства, пријатели и сограѓани. Ѕидот бил изграден во август 1961 година од властите на Источна Германија, со цел да се спречи масовното заминување на населението кон Запад. Со текот на годините, стана еден од најпрепознатливите симболи на Студената војна и политичката поделба на Европа.
Една изјава што ја промени историјата
Во 1989 година, под притисок на масовните протести и барањата за поголеми слободи, источно германските власти најавија олеснување на правилата за патување. На прес-конференција, владиниот претставник Гинтер Шабовски нејасно соопшти дека новите правила стапуваат во сила веднаш, по што илјадници граѓани се упатија кон граничните премини. Соочени со огромен број луѓе, граничарите на крајот ги отворија премините, а Берлинчани од двете страни се прегрнуваа и славеа. Наскоро, со чекани и други алатки, граѓаните почнаа да го уриваат бетонскиот ѕид што со децении ги разделуваше.
Помалку од една година подоцна Германија се обедини
Падот на Берлинскиот ѕид стана симбол на крајот на поделбата на Европа и почетокот на нова политичка ера. На 3 октомври 1990 година, помалку од една година по историската ноќ, Источна и Западна Германија официјално се обединија. И денес, 9 ноември останува датум што потсетува на значењето на слободата на движење, правото на избор и човечката поврзаност.
