МИЦКОСКИ: СТРУЈАТА НЕМА ДА ПОСКАПИ – ЕСМ ќе понуди иста цена како минатата година, се бара решение и за парното

Премиерот Христијан Мицкоски најави дека државната компанија АД ЕСМ ќе понуди иста цена на електричната енергија како и минатата година, со цел да се избегне поскапување на струјата за граѓаните. Тој најави и дека Владата ќе се обиде да спречи големо зголемување на цената на парното греење. Одговарајќи на новинарско прашање за цените на енергенсите, Мицкоски оцени дека состојбата на европските пазари е алармантна поради високите берзански цени на струјата и гасот. Според него, цената на електричната енергија достигнува и над 400 до 500 евра за мегават-час, додека гасот повторно надминал 90 евра.

ЕСМ ќе ја задржи досегашната цена на струјата

Мицкоски посочи дека Владата, преку АД ЕСМ, подготвила деловен модел со кој ќе се задржи постојната цена на електричната енергија. Тој најави дека компанијата до крајот на 2027 година ќе цели кон остварување добивка, и покрај неповолните услови на енергетските пазари. Целта, како што нагласи, е граѓаните да бидат заштитени од дополнителен ценовен притисок.

Владата бара начин да го ограничи поскапувањето на парното

Во однос на парното греење, премиерот рече дека барањето за зголемување на цената е значително, а гасот е трипати поскап отколку во истиот период минатата година. Сепак, најави дека Владата ќе се обиде поскапувањето да го ограничи на ниво што граѓаните ќе можат да го поднесат. Мицкоски порача дека приоритет останува заштитата на животниот стандард и дека преку расположливите мерки засега успеваат да го ублажат притисокот од високите цени на енергенсите.