АЛКАРАЗ СЕ ВРАЌА НА ТЕРЕНИТЕ: Пријавен е за УС Опен

Карлос Алкараз се најде на листата на пријавени тенисери за последниот Гренд слем турнир во годината – УС Опен. Организаторите го вклучија името на шпанскиот тенисер, кој треба да се врати на терените по повеќемесечна пауза поради повреда. Американските медиуми го вбројуваат меѓу главните кандидати за освојување на трофејот во Њујорк.

Не е целосно подготвен за враќање

Сепак, шпанските медиуми објавуваат дека Алкараз сè уште не е целосно подготвен за натпреварување. Според нивните информации, неизвесен е и неговиот настап на Мастерсот во Синсинати, кој ќе се игра од 13 до 23 август. Дури и доколку настапи, се наведува дека Шпанецот можеби нема да биде на своето највисоко ниво.

Ќе ја брани титулата во Њујорк

Алкараз треба да ја брани титулата на УС Опен, кој започнува на 30 август и ќе трае до 13 септември. Тој е надвор од тениските терени од 15 април поради повреда. Неговиот настап во Њујорк ќе зависи од тоа како ќе се одвива закрепнувањето во следните недели.