МУ ГО ВРАТИЛЕ ПАСОШОТ, ПА ЈА НАПУШТИЛ МАКЕДОНИЈА: Бизнисменот Борче Марковски заминал кон Србија

Битолскиот бизнисмен и почесен конзул на Белорусија, Борче Марковски, ја напуштил Македонија откако Основниот суд во Струга му го вратил пасошот. Тој на 29 јули бил задржан на граничниот премин „Табановце“, но по извршените проверки му било дозволено да продолжи кон Србија. Причината била што во службените системи немало активна мерка со која би му било забрането да ја премине државната граница.

Пасошот му бил вратен по гаранција од над пет милиони евра

Од струшкиот суд потврдиле дека пасошот му бил вратен бидејќи Марковски приложил гаранција во имот вредна над пет милиони евра. Претседателот на судот, Вулнет Винца, изјавил дека според нивното толкување не можат истовремено да важат и гаранцијата во имот и мерката одземање пасош. Неофицијално, Основното јавно обвинителство Струга се противело на враќањето, додека позитивно мислење дало Вишото јавно обвинителство Битола.

Обвинет е во случај поврзан со тендер во РЕК „Битола“

Марковски и уште седум лица се обвинети за злоупотреби при јавна набавка за дислокација на погонски станици од ТЕЦ „Осломеј“ во РЕК „Битола“. Според обвинението, договорот бил вреден околу 1,7 милиони евра, а компанијата на Марковски наводно наплатила средства за работи што не биле целосно извршени. Судењето од Битола било префрлено во Основниот суд во Струга, а новото рочиште е закажано за 2 септември 2026 година.