ЈАНЕВСКА: Нема да има отпуштања на наставници и покрај оптимизацијата на училиштата

Оптимизација без загрозување на работните места

Министерката за образование и наука Весна Јаневска порача дека реформите во образовниот систем ќе продолжат, но без загрозување на работните места на наставниците.
На прес-конференција во Владата, таа истакна дека оптимизацијата на училишната мрежа нема да значи отпуштања на наставен кадар.
Јаневска посочи дека во последните седум години бројот на ученици е намален за околу 17 илјади, што ја наметнува потребата од подобра организација на образовниот процес.

Учебниците најавени навреме за 1 септември

Според министерката, оптимизацијата на училиштата и воведувањето едносменска настава се меѓу клучните приоритети во образованието.
Таа информираше дека повеќе од 200 училишта веќе работат во една смена, а целта е ваквиот модел постепено да се проширува.
Јаневска најави и дека учениците и оваа година ќе ги добијат учебниците навреме, односно на 1 септември.
Министерката додаде дека во изминатите две години платите во образованието се зголемени за повеќе од 20 проценти.
Таа порача дека реформите треба да донесат поквалитетно образование, подобри услови за учениците и поголема ефикасност во училишниот систем.