Внимавајте на лажни СМС пораки: Измамници ветуваат поврат на ДДВ

УЈП предупредува на нов обид за измама

Управата за јавни приходи предупредува граѓаните за појава на лажни СМС пораки во кои се известуваат дека нивниот даночен поврат е подготвен. Во пораките има линк преку кој од граѓаните може да се побара внесување лични и банкарски податоци. Од УЈП апелираат граѓаните да не го отвораат линкот доколку ја добијат ваквата порака. Станува збор за можен обид за измама и злоупотреба на лични и финансиски податоци.

Информациите проверувајте ги само преку УЈП

Од Управата посочуваат дека сите информации поврзани со даночните услуги треба да се проверуваат исклучиво преку официјалните канали на УЈП. Граѓаните се повикуваат да не внесуваат чувствителни податоци на линкови добиени преку сомнителни пораки. За проверка може да се користат официјалната веб-страница, е-услугите и објавените телефонски броеви и контакт-адреси на Управата.