ЦРНА ГОРА БРЗА КОН ЕУ: Пет членки побараа пауза во преговорите

Септемвриското затворање на поглавјата е одложено

Црна Гора влезе во завршната фаза од преговорите со Европската Унија со план до крајот на 2026 година да ги затвори сите преостанати поглавја, но планот за септември засега е одложен. Според дипломатски извори на кои се повикува „Трн.мк“, Холандија, Хрватска, Естонија, Литванија и Летонија побарале дополнителни проверки пред да дадат согласност за нова меѓувладина конференција. Црна Гора ги има отворено сите 33 преговарачки поглавја, од кои 18 се привремено затворени. Последните две, конкуренција и царинска унија, беа затворени на 14 јули.

Црна Гора целта ја постави за крајот на 2026 година

Црногорската влада планира преостанатите 15 поглавја да ги затвори до крајот на годинава, а договорот за пристапување да биде финализиран во првата половина на 2027 година. Како области во кои се потребни дополнителни резултати се издвојуваат владеењето на правото и судството, додека Хрватска со напредокот на Црна Гора поврзува и повеќе билатерални прашања. И покрај одложувањето, процесот на пристапување не е запрен, а нова меѓувладина конференција би можела да се одржи во октомври доколку се постигне согласност меѓу сите 27 земји членки. Црна Гора и понатаму цели кон членство во ЕУ во 2028 година.