„ДОСАДНО МИ Е“: Пилот испиша порака на небото, а за награда доби слободен ден

Пилот на мал авион во Велика Британија направил необична шега за време на пробен лет, испишувајќи ја пораката „Досадно ми е“ со движењето на леталото. Неговата несекојдневна рута била забележана преку апликацијата „FlightRadar24“ и веднаш го привлекла вниманието на јавноста.

Пораката ја „нацртал“ со авионот

Авионот „Пајпер Томахок“ на компанијата „Равенеир“ полетал од Ливерпул и летал над Вирал, Чешир и Северен Велс. Наместо вообичаена тест-рута, пилотот со прецизни маневри ги оформил зборовите „Досадно ми е“ на мапата на летот.

Од компанијата потврдиле дека станувало збор за инструктор по летање кој изведувал пробен лет по замена на дел од моторот. Оперативниот директор Вејн Барет изјавил дека за да ја испише пораката, пилотот морал да покаже голема вештина и целосна концентрација.

Наместо казна добил слободен ден

„Можеби му било здодевно бидејќи летот бил само проверка, но за да ги испише зборовите морал максимално да се концентрира“, изјавил Барет.

Од компанијата соопштиле дека пилотот нема да биде казнет поради необичната шега. Напротив, по успешно завршениот лет добил слободен ден, а авионот безбедно се вратил во хангарот.