ЕЛЕКТРИЧЕН АВТОМОБИЛ ЗА САМО 500 ЕВРА: Франција воведува субвенции за половни електрични возила

Голема помош за купувачите

Франција воведува нова субвенција за граѓаните кои купуваат половен електричен автомобил, со поддршка до 2.000 евра. Мерката стапува на сила од 1 септември и има цел електричните возила да станат подостапни за поширок круг граѓани. Во одредени случаи, благодарение на субвенцијата, автомобил кој чини околу 2.500 евра би можел да го чини купувачот само 500 евра. Програмата е дел од пошироката стратегија на Франција за забрзување на електрификацијата на транспортот и обновување на возниот парк.

Кои автомобили ги исполнуваат условите?

Мерката не важи за сите половни електрични автомобили, туку се предвидени строги услови за користење на субвенцијата. Возилото мора да биде прво регистрирано во Франција меѓу 1 јануари 2017 и 31 декември 2023 година, да биде купено од регистриран продавач и да има најмалку 80 проценти преостанат капацитет на батеријата. Дополнително, купувачот мора да го задржи автомобилот во своја сопственост најмалку три години. Програмата е планирано да трае четири години и може да стане пример и за други европски земји.