ЃОКОВИЌ ПРЕДЛАГА ГОЛЕМА ПРОМЕНА ВО ТЕНИСОТ: Бен Шелтон ја поддржа идејата за пократки мечеви

Сетовите би се играле до четири освоени гема

Новак Ѓоковиќ предложи промена на тениските правила со цел мечевите да траат пократко и ретко да надминуваат два часа. Според неговата идеја, сетовите би се играле до четири освоени гема, а при резултат 40:40 не би имало предност, туку следниот поен директно би го решавал гемот. Предлогот доби поддршка од американскиот тенисер Бен Шелтон, кој изјави дека форматот му изгледа интересен. Тој посочи дека особено е впечатливо што ваква промена предлага токму Ѓоковиќ, тенисер познат по способноста да игра долги и исцрпувачки натпревари.

Шелтон: Би сакал да играм во ваков формат

Шелтон признава дека промената веројатно би наишла на отпор поради традиционалниот карактер на тенисот. Сепак, Американецот вели дека со задоволство би настапувал по вакви правила, слични на оние што веќе се користат на турнирите Next Gen. Нему му се допаѓа и можноста мечевите во ваков формат да се играат на три добиени сета. Шелтон моментно ја брани титулата на Мастерсот во Монтреал, а по елиминациите на повеќе фаворити остана единствениот тенисер од Топ 10 на турнирот.