ИСЛАНД Е НАЈМИРНАТА ЗЕМЈА ВО СВЕТОТ: Македонија се најде на 46. место, Словенија е четврта

Исланд е прогласена за најмирна земја во светот

Исланд повторно е прогласена за најмирна земја во светот, додека Македонија се наоѓа на 46. позиција на најновото рангирање на Глобалниот индекс на мирот за 2026 година. Според извештајот на Институтот за економија и мир (IEP), објавен на 9 јуни, Исланд го задржува првото место 19-та година по ред. На второто место е Нов Зеланд, следуваат Швајцарија, Словенија и Ирска. Словенија е најдобро рангирана балканска држава, додека Македонија се наоѓа во средината на листата.

Како се рангирани земјите од регионот?

Од земјите во регионот, по Словенија на четвртото место, следуваат Хрватска на 23., Црна Гора на 30., Албанија на 36., Македонија на 46., Босна и Херцеговина на 48. и Србија на 70. место. Најголем напредок меѓу нив бележи Босна и Херцеговина, која се искачила за девет позиции, додека Албанија напредувала за седум места. Хрватска и Словенија се подобриле за по две позиции, Србија за пет, а Црна Гора забележала пад од две места.

Глобалната безбедност бележи влошување

Индексот опфаќа 163 држави и територии, во кои живеат 99,7 проценти од светското население, а рангирањето се темели на 23 показатели поврзани со општествената безбедност, конфликтите и милитаризацијата. На последното, 163. место е Русија, а меѓу петте најслабо рангирани држави се и Судан, Демократска Република Конго, Украина и Израел. Извештајот покажува дека глобалното ниво на мир е намалено за 0,7 проценти, што е дванаесетта последователна година со негативен тренд. Во 99 држави е забележано влошување, додека 62 бележат подобрување, а во текот на 2024 година биле регистрирани 61 активен вооружен конфликт во кој учествувале држави – најмногу од крајот на Втората светска војна.