МУЦУНСКИ ЗА ОХРИД: Имаме јасен план и пет години за исполнување на препораките на УНЕСКО

Министерот за надворешни работи и надворешна трговија, Тимчо Муцунски, изјави дека државата има јасен план за спроведување на препораките на УНЕСКО за Охридскиот Регион. Тој посочи дека централната и локалната власт имаат воспоставено координација и конкретни насоки за активностите што треба да се преземат. Македонија доби период од пет години за да постапи по забелешките, со обврска редовно да известува за постигнатиот напредок.

Фокус на урбанизмот и животната средина

Препораките се однесуваат на повеќе области, меѓу кои урбанистичкото планирање и заштитата на животната средина. Муцунски нагласи дека дел од мерките веќе се спроведени во текот на последната година, но работата ќе продолжи по сите забелешки. Во однос на дивоградбите, тој порача дека секој предмет треба да се решава поединечно и во согласност со законите, со соработка меѓу централната и локалната власт.

Статусот на УНЕСКО не треба да го запре развојот

Според министерот, заштитата на природното и културното наследство не треба да значи економско, туристичко и социјално назадување на Охридскиот Регион. Тој истакна дека со земјите членки на Комитетот на УНЕСКО било разговарано и за важни инфраструктурни проекти, меѓу кои и делниците од Коридорот 8 што минуваат низ регионот. Муцунски ја оцени одлуката Охридскиот Регион да остане на листата на светско наследство како значаен дипломатски успех за Македонија.