Македонија
Дознај прв
МВР ОФИЦИЈАЛНО – УАПСЕН АЛЕКСАНДАР ЛАЗАРОВ: Минатата недела избега низ прозорец од полициската станица во Кочани
Александар Лазаров, кој минатата недела избега низ прозорец од полициската станица во Кочани, е уапсен во Скопје и спроведен во ПС Кисела Вода.
Полицијата во Скопје го уапси 41-годишниот Александар Лазаров од Кочани, кој минатата недела успеа да избега низ прозорец од Полициската станица во Кочани. По него беа распишани централна и меѓународна потерница по барање на Основниот суд во Кочани.
Пронајден и уапсен во Скопје
Од Министерството за внатрешни работи информираа дека Лазаров бил лишен од слобода на 14 јули, откако полициските службеници добиле оперативни информации за неговото движење. Акцијата ја спровеле припадници на СВР Скопје – Потраги.
По апсењето, Лазаров бил спроведен во Полициската станица Кисела Вода, каде што продолжила постапката против него. Тој е осомничен за кривично дело поврзано со неовластено производство и пуштање во промет на наркотични дроги, психотропни супстанции и прекурзори.
Избегал еден ден по приведувањето
Лазаров претходно бил приведен на влезот во виничкото село Истибања, заедно со 25-годишно лице. При претресот на автомобилот во кој се превезувале, инспекторите пронашле и одзеле бела прашкаста материја.
Следниот ден тој успеал да избега од полициската станица во Кочани, по што полицијата започнала потрага и распишала меѓународна потерница. По неколкудневното бегство, Лазаров бил пронајден и уапсен во Скопје.
