ПЕТРОВСКА ПОНУДИ ПОМОШ ЗА МЕЛАНИЈА ОД КУМАНОВО: „Нема да дозволиме оваа борба да ја водите сами“

Пратеничката од редовите на СДСМ, Славјанка Петровска, јавно понуди помош за Меланија Цветковска од Куманово и нејзиното семејство. Реакцијата следува откако младата девојка преку социјалните мрежи побара заштита, тврдејќи дека семејството со години се соочува со насилство од нејзиниот татко.

Понудено привремено безбедно сместување

Петровска соопшти дека нејзиниот тим е подготвен да помогне во обезбедување привремено безбедно сместување за Меланија, нејзината мајка, баба и братот кој има церебрална парализа. Таа најави и контакти со општествено одговорни компании, организации и хумани граѓани за да се обезбедат подолгорочна поддршка и достоинствени услови за семејството.

Пратеничката побара Меланија да ја контактира преку Фејсбук за веднаш да започнат со организирање конкретна помош. Таа порача дека никој не треба да остане сам кога јавно бара заштита и дека институциите мора да го спречат секој ризик од ново насилство.

Таткото ќе биде испратен на задолжително лекување

Основниот суд донел решение таткото на Меланија да биде упатен на задолжително психијатриско лекување во Специјалната психијатриска болница во Демир Хисар. Одлуката била донесена врз основа на медицинска документација и вештачења изработени во текот на постапката.

Меланија претходно јавно побара помош од институциите, посочувајќи дека нејзиното семејство живее во страв. Засега се очекуваат натамошни мерки за долгорочна заштита и поддршка на семејството.