ПИЈАНО ВЕЧЕР НА „ОХРИДСКО ЛЕТО“: Кинескиот пијанист Сихенг Сонг вечерва во „Света Софија“

Концерт на кинескиот пијанист

Во црквата „Света Софија“ вечерва од 21 часот ќе се одржи целовечерен концерт во рамките на фестивалот „Охридско лето“, на кој ќе настапи кинескиот пијанист Сихенг Сонг. Сонг е роден во Шангај во 1981 година и важи за еден од најдобрите пијанисти од својата генерација. Своето музичко образование го стекнувал во Франција, на Високата школа за музика во Париз и Парискиот конзерваториум. Во текот на кариерата има освоено бројни меѓународни награди, меѓу кои и престижниот натпревар „Лонг-Тибо“ во 2004 година, каде што стана првиот победник од кинеска националност.

Уметник со настапи низ целиот свет

Неговите настапи го однеле на најголемите светски сцени, меѓу кои во Токио, Сеул, Пекинг, Шангај, Париз, Берлин и Њујорк. Сонг настапувал и со реномирани оркестри од Европа и Азија, како и на повеќе престижни музички фестивали. Од 2010 година развива и посебен концертен формат во кој класичниот пијано-рецитал го комбинира со мултимедија, театар, уметност и литература. Со тоа, како што се наведува, се обидува класичната музика да ја доближи до публиката на 21 век.