ПП30 И ПП50 ЗАМИНУВААТ ВО ИСТОРИЈАТА: Сметки и даноци од денеска ќе се плаќаат со нови шифри и обрасци по меѓународни стандарди

Од денеска, 9 ноември 2026 година, во Македонија почнува примената на новите правила во домашниот платен промет, со кои досегашните трицифрени шифри за плаќање се заменуваат со четиризнаковни ознаки. Промените се воведуваат согласно меѓународниот стандард ISO 20022 и се однесуваат на домашните денарски плаќања на граѓаните и компаниите. Новиот систем опфаќа плаќање фактури, плати, услуги, режиски трошоци, осигурување, авансни уплати и други финансиски обврски.

Кои се новите шифри за плаќање?

На пример, досегашната шифра 200 за промет на производи и стоки меѓу правни субјекти се заменува со GDDS, додека шифрата 220 за извршени услуги се заменува со GDSV. За авансните плаќања, наместо 250, ќе се користи ADVA, а досегашната шифра 930 се заменува со OTHR, односно „останато“. Новите ознаки не секогаш претставуваат директна замена еден на еден, па изборот зависи од конкретната намена на трансакцијата.

Се менуваат и платните налози

Новата регулатива предвидува и стандардизација на платните налози, како и користење на IBAN форматот за домашните денарски сметки, при што пред постојниот број се додава ознаката MK07. Досегашните обрасци, меѓу кои и ПП30, се заменуваат со нови стандардизирани налози, а банките ги приспособуваат своите електронски и мобилни системи. Шифрата за целта на плаќањето не е задолжителен елемент за прием и извршување на налогот, но нејзиното правилно користење овозможува попрецизна евиденција на трансакциите. Компаниите и сметководствените служби ќе треба да ги приспособат своите интерни системи и евиденции кон новите правила.