„СИТЕ МОИ СЛИКИ“ ЌЕ ОДЕКНУВА ВО ОХРИД: Голем концерт на „Ареа“ на 31 јули

Македонските рок-хитови во Античкиот театар

Една од најпопуларните македонски рок-групи, „Ареа“, на 31 јули ќе одржи концерт во Античкиот театар во Охрид. Настапот ќе започне во 21 часот и ќе се одржи во рамките на С.О.С. Фестивал 2026. Публиката ќе има можност во уникатниот амбиент под отворено небо да ги слушне најпознатите песни од повеќедецениската кариера на гостиварскиот бенд. На репертоарот се најавени хитовите „Сите мои слики“, „Јас сум ти пријател“, „Одведи ме“, „Биди мој“ и други омилени песни.

Вечер исполнета со рок-енергија

Организаторите најавуваат вечер исполнета со безвременска македонска музика и препознатливата рок-енергија на „Ареа“. Пред охридската публика ќе настапат вокалистката Ружица Милошеска-Брчиоска, гитаристот Ивица Брчиоски и останатите членови на групата. Концертот претставува можност публиката во живо да ги слушне песните со кои „Ареа“ остави силен белег на домашната музичка сцена. Билетите за концертот се достапни преку продажната мрежа на „Wayin“.