ТОПЛОТЕН БРАН ЈА ЗАФАТИ СЛОВЕНИЈА: Прогласени портокалова и црвена фаза, температури до 39 степени

Портокалова и црвена фаза поради високата опасност од пожари е прогласена за крајот на неделата на целата територија на Словенија. Највисокото, црвено ниво на опасност важи за Копер, Сежана, Дивача, Хрпелје-Козина, Комен, Нова Горица, Мирен-Костањевица и Ренче-Вогрско. Во останатите делови од земјата е прогласена портокалова фаза, која означува висока опасност од избувнување и ширење пожари.

Забрането палење оган на отворено

На целата територија на Словенија е забрането палење оган на отворен простор, фрлање запалени предмети и користење материјали или уреди што можат да предизвикаат пожар. Забраната се однесува и на палење оган во близина на инфраструктурни објекти, како и на користење огномети. Полицијата и надлежниот инспекторат најавија засилен надзор во периодот додека е прогласена висока и многу висока опасност од пожари.

Температурите ќе достигнат до 39 степени

Словенечката Агенција за животна средина предупреди дека топлотното оптоварување дополнително ќе се зголеми кон крајот на неделата. Во југозападниот дел од земјата е издадено црвено предупредување, а температурите се очекува да достигнат до 39 Целзиусови степени. Портокаловата фаза во петок ќе важи за целата земја, додека во сабота и недела црвената фаза ќе биде активна во југозападна Словенија.