(ВИДЕО) АРГЕНТИНА СО ГОЛЕМ ПРЕСВРТ ДО ФИНАЛЕ: Англија водеше до 85. минута, Меси со две асистенции ја врати „гаучосите“

Фудбалската репрезентација на Аргентина ја победи Англија со 2:1 по голем пресврт и обезбеди пласман во финалето на Светското првенство, каде што ќе го брани освоениот трофеј. Англичаните водеа до 85. минута, но актуелниот светски шампион со два доцни погодоци целосно го промени исходот на полуфиналето во Атланта.

Англија поведе, а потоа целосно се повлече

Првото полувреме помина во цврста и претпазлива игра, без поголеми можности пред двата гола. По паузата Аргентина заигра поофанзивно, но Англија прва стигна до водство во 52. минута, кога Ентони Гордон со глава го совлада Емилијано Мартинез по додавањето на Морган Роџерс.

По постигнатиот гол, селекторот Томас Тухел го повлече англискиот тим во дефанзива, а Аргентина создаваше сè поголем притисок пред голот на Џордан Пикфорд. Алексис Мекалистер ја погоди стативата, додека останатите аргентински фудбалери постојано се обидуваа да стигнат до израмнување.

Фернандез израмни, Лаутаро погоди во 92. минута

Отпорот на Англија беше скршен во 85. минута, кога Енцо Фернандез по додавање од Лионел Меси упати прецизен удар од околу 20 метри и израмни на 1:1. Аргентина продолжи да напаѓа и не се задоволи со продолженија.

Целосниот пресврт пристигна во 92. минута. Меси испрати центаршут во шеснаесетникот, а Лаутаро Мартинез со удар со глава ја смести топката во мрежата за победа од 2:1 и големо славје на аргентинските навивачи. Во финалето Аргентина ќе игра против Шпанија, додека Англија ќе се бори со Франција за третото место.