ЗАБЕЛЕЖАНА МЕЧКА НАД ГОРНО КОЊСКО: Од Националниот парк „Галичица“ со важен апел до посетителите

МЕЧКА НАД ГОРНО КОЊСКО

Туристи денеска забележале мечка во реонот над селото Горно Коњско, информираа од Јавната установа Национален парк „Галичица“. Поради присуството на дивото животно, од паркот упатија апел за зголемена внимателност до жителите, посетителите, планинарите и сите лица кои престојуваат или работат во овој дел од охридскиот регион.

Да не се приближуваат и да не оставаат храна

Од Националниот парк ги повикуваат граѓаните да се придржуваат до препораките за безбедно движење во природа и да избегнуваат ситуации што би можеле да доведат до непосредна средба со мечката. Посетителите не треба да им се приближуваат на дивите животни, ниту да оставаат храна во природата.

Надлежните апелираат информацијата да биде споделена и со локалното население, како и со лицата кои извршуваат активности во регионот, за сите навреме да бидат предупредени и претпазливи.

И претходно мечки се приближувале до населени места

Појавата на мечки во охридскиот регион не е невообичаена, особено во пределите на Националниот парк „Галичица“, каде кафеавата мечка е дел од природниот биодиверзитет. Во изминатите години биле регистрирани случаи на приближување до населени места, пчеларници и земјоделски површини.

Во 2023 и 2024 година жители и пчелари од Горно Коњско и Горица пријавиле штети на пчеларници, откако мечка со младенче се приближила до населениот простор. Од паркот повторно повикаа на почитување на препораките за да се избегнат несакани средби со дивечот.