Западнонилската треска не стивнува: 21 пациент се лекува на Инфективна, шестмина се на интензивна нега

53 лица досега биле заболени или се сомнителни

На Клиниката за инфективни болести во моментов се лекуваат 21 пациент поради западнонилска треска, од кои кај 18 е лабораториски потврдено присуството на вирусот, додека за тројца се чекаат резултатите од тестирањата. Министерот за здравство Сашо Клековски информира дека досега вкупно 53 пациенти прележале, имаат или се сомнителни на западнонилска треска. Од нив, 50 случаи се потврдени, а три се водат како сомнителни и се хоспитализирани на Инфективната клиника. Поголемиот дел од пациентите, односно 52, имале невроинвазивна форма на заболувањето.

Шест пациенти се на интензивно лекување

Според Клековски, досега 25 пациенти кои биле лекувани на Инфективната клиника се излекувани и пуштени на домашно лекување. Од 21 пациент кој моментално е хоспитализиран, шестмина се на интензивно лекување поради потешката клиничка слика. Еден пациент бил лекуван во приватна здравствена установа, а министерот посочи дека здравствениот систем продолжува да ги следи состојбата и капацитетите за згрижување на заболените.