МИНИСТЕРСТВОТО ЗА ПРАВДА: ЕК ГИ ПРЕПОЗНА РЕЗУЛТАТИТЕ ОД РЕФОРМИТЕ ВО ПРАВОСУДСТВОТО

Напредокот во реформите во правосудството, новите законски решенија и усогласувањето со европските стандарди се меѓу позначајните достигнувања нотирани во Извештајот на Европската комисија, соопшти Министерството за правда. Како важен чекор се посочува спроведувањето на Стратегијата за реформа на правосудството 2024–2028, како и донесувањето на новите закони за Судскиот совет и Советот на јавните обвинители. Од Министерството оценуваат дека овие резултати се потврда за досегашниот напредок, но и обврска реформите да продолжат.

Нови закони и напредок во правосудните реформи

Во Извештајот се нотирани и законите за платите на судиите и јавните обвинители, новиот Закон за парничната постапка и напредокот во подготовката на Патоказот за владеење на правото. Посебно се издвојува новиот Закон за Судскиот совет, кој во голема мера ги адресира препораките на Венецијанската комисија. Европската комисија ја нотира и општата усогласеност на законската рамка за основните права со европските стандарди.

Фокусот се префрла на примената на законите

Од Министерството за правда посочуваат дека во наредниот период приоритет ќе биде доследната примена на донесените законски решенија и исполнувањето на препораките на Европската комисија. Нагласуваат дека успехот на реформите не се мери само според бројот на усвоени закони, туку и според нивното влијание врз институциите и правата на граѓаните. Крајната цел, како што наведуваат, е независен, професионален, транспарентен и ефикасен правосуден систем, во кој законот важи подеднакво за сите.