УАПСЕНА ГРАДОНАЧАЛНИЧКАТА ПОСТАВЕНА ОД СНС НА ВУЧИЌ: Приведени и двајца градски функционери

Полицијата во Србија ја уапси градоначалничката на Смедерево, Јасмина Војиновиќ, заедно со раководителката на градската администрација, Ивана Стаменковиќ, и директорот на комуналното претпријатие „Зеленило“ и гробиштата, Мирослав Илиќ. Тројцата се уапсени денеска по наредба на Основното јавно обвинителство во Смедерево, а им е одреден притвор до 48 часа, по што треба да бидат сослушани. Засега нема официјални информации за кривичните дела за кои се осомничени.

Апсењата наводно се поврзани со градската депонија

Според неофицијални информации објавени од локалните медиуми, апсењата се поврзани со проблемите околу градската депонија. Сè уште не е познато што конкретно било спорно во нејзиното работење, а надлежното обвинителство засега нема објавено подетално образложение за приведувањата.

Градоначалничката е членка на СНС

Војиновиќ (55) е членка на Српската напредна партија (СНС) и градоначалничка на Смедерево од 2023 година. Претходно работела како наставничка, а имала и неколку функции во градската администрација, додека од март 2023 година е претседателка на градскиот одбор на СНС во Смедерево. Таа неодамна беше во центарот на вниманието и по парламентарните избори во Србија на 25 октомври, кога локални опозициски активисти влегоа во нејзината канцеларија и побараа да си поднесе оставка, но таа го одби барањето. По случувањата, српскиот претседател Александар Вучиќ јавно ја поддржа, а според досегашните информации, денешното апсење е поврзано со депонијата, а не со постизборните настани.