ГЛОБАЛЕН КОЛАПС НА „МАЈКРОСОФТ“: Милиони корисници без пристап до Outlook, Teams и Copilot

Милиони луѓе ширум светот се соочуваат со проблеми при користењето на услугите на „Мајкрософт“, откако глобален технички прекин ги погоди апликациите Outlook, Teams и Copilot. Прекинот трае повеќе од 10 часа, а експертите предупредуваат дека последиците би можеле да предизвикаат штети од милијарди долари. Од компанијата ги отфрлија сомнежите за хакерски напад и соопштија дека работат на отстранување на проблемот, објавува Би-Би-Си. Според Downdetector, за само еден час проблемот бил пријавен во 74 држави, а бројот на пријави за Outlook достигнал речиси 140.000, повеќе од 2.000 пати над вообичаеното ниво.

Сервери на Мајкрософт откажале, а преостанатите не можеле да го издржат оптоварувањето

Од „Мајкрософт“ објасниле дека причината не е кибернетички напад, туку проблем во нивната инфраструктура, при што одреден број сервери неочекувано престанале да работат. Тоа предизвикало зголемено оптоварување на преостанатите сервери, кои не можеле да ги обработат сите барања. Иако компанијата првично соопштила дека забележува позитивни резултати од преземените мерки, подоцна признала дека поправката не се одвива според очекувањата. Дополнително, предупредила дека услугите би можеле повторно да паднат кога корисниците масовно ќе се поврзат, поради што се тестираат алтернативни начини за пристап.

Погодени институции, компании и здравствени системи ширум светот

Последиците се почувствувале и надвор од обичната деловна комуникација, а меѓу погодените се и OpenAI, Anthropic, државни служби во Сингапур и Австралија, американскиот Конгрес, како и австралиската разузнавачка служба и федералната полиција. Во Австралија биле пријавени проблеми и во здравствениот систем, но лекарското здружение уверило дека грижата за пациентите не е загрозена, бидејќи болниците можат да се вратат на хартиени рецепти. Експертите предупредуваат дека прекинот покажува колку светската инфраструктура зависи од услугите на неколку големи технолошки компании и колку се важни резервните планови. Во меѓувреме, банките, универзитетите и институциите предупредуваат на лажни пораки и СМС-пораки со наводна ИТ-поддршка, преку кои измамници се обидуваат да украдат лични податоци или да инсталираат злонамерни апликации. На социјалните мрежи, пак, корисниците се шегуваат на сметка на корпоративниот живот и зависноста од електронската пошта, споделувајќи и предлози за враќање во раните 2000-ти.