ДЕНЕСКА СЕ ПРАЗНУВА СВЕТА АНА: Мајката на Пресвета Богородица особено ја почитуваат семејствата кои се молат за пород

Верниците го одбележуваат Успението на Света Ана

Православните христијани денеска, 7 август, го празнуваат Успението на Света Ана, мајката на Пресвета Богородица Марија. Во селото Маловишта кај Битола празникот традиционално се одбележува во црквата посветена на Света Ана. Според народните верувања, ова место особено го посетуваат брачни двојки кои се молат да добијат дете. Дел од верниците го практикуваат и обичајот да преноќат во манастирот во ноќта меѓу 6 и 7 август, а во близина се наоѓа и извор за кој во традицијата се верува дека има лековита вода.

Света Ана и Јоаким долго немале деца

Според црковното предание, Света Ана и нејзиниот сопруг Јоаким со години немале деца, а подоцна ја добиле ќерката Марија – Пресвета Богородица. По нејзиното раѓање, тие ветиле дека ќе ја посветат на Бога и на храмот. Денеска се празнува Успението на Света Ана, додека нејзиниот главен празник во православниот календар се одбележува на 9 септември. Црквата во Маловишта била изградена во 1936 година и до денес останува место кое го посетуваат бројни верници.