ДУИ ПОВТОРНО СЕ ЖАЛИ ЗА ПРАВОСУДНИОТ ИСПИТ: 12 Албанци и во октомври ќе полагаат на македонски јазик

Министерството за правда подготвува средба со студентите и деканите

Правосудниот испит на албански јазик сè уште нема конкретно решение, а Министерството за правда подготвува средба со студентите и деканите на правните факултети. Во меѓувреме, во октомврискиот испитен рок 52 кандидати ќе го полагаат правосудниот испит на македонски јазик, од кои 12 се Албанци, соопшти ДУИ.

Од ДУИ велат дека прашањето повторно се одложува

Од партијата оценуваат дека најавените консултации не претставуваат решение, туку дополнително одложување. Од ДУИ потсетуваат дека министерот за правда Јетон Шасивари, во периодот кога бил професор, го критикувал тогашниот министер за правда поради, како што наведуваат, оневозможувањето на полагањето на правосуден испит на албански јазик.

ДУИ бара прашањето да се реши веднаш

Од ДУИ бараат Шасивари да одговори зошто 12 албански кандидати и во октомврискиот рок треба да го полагаат испитот на македонски јазик, доколку правосуден испит на албански јазик е „на пат кон решение“. Партијата бара прашањето да биде решено веднаш, наместо, како што наведуваат, повторно да се одложува.

Извор: Макфакс