ГОСТИВАРЦИ СÈ УШТЕ БЕЗ ПИТКА ВОДА: Бактеријата останува и по засиленото хлорирање

Водата и натаму не смее да се пие

Состојбата со водоснабдувањето во Гостивар останува непроменета, а водата од градскиот водовод и натаму не е безбедна за пиење. И покрај спроведеното засилено хлорирање, во системот сè уште е присутна бактерија која може да предизвика здравствени проблеми. Поради тоа, надлежните не успеале да ги обезбедат потребните три последователни исправни лабораториски резултати. До добивањето на таквите анализи, забраната за користење на водата за пиење останува во сила.

Закажан состанок на Кризниот штаб

Кризниот штаб за попладнево најави нов состанок на кој треба да се разгледаат следните чекори за надминување на проблемот. Граѓаните очекуваат информации и за можните здравствени последици кај лицата кои веќе пријавиле симптоми. Надлежните треба да соопштат дали постои опасност од појава на жолтица или други заболувања поврзани со неисправната вода. До ново известување, жителите треба да ги почитуваат препораките и да користат безбедна вода за пиење и подготовка на храна.