САХАРСКИ ВОЗДУХ ЈА НОСИ ЕВРОПА КОН 47 СТЕПЕНИ: Екстремна жештина и висок ризик од пожари

Екстремно топла и сува воздушна маса од Сахара се движи кон југозападна Европа и во следните денови ќе донесе температури до 47 Целзиусови степени. Најпогодени ќе бидат јужните и источните делови на Шпанија, особено Мурсија, Аликанте, Валенсија и долините на реките Гвадалквивир и Ебро.

Температурите ќе се доближат до историскиот рекорд

Во централна и јужна Шпанија се очекуваат температури од 42 до 44 степени, додека во четврток во делови од источните и јужните низини живата во термометрите може да достигне меѓу 44 и 46 степени. Локално се можни и 47 степени, со што температурите би се доближиле до шпанскиот рекорд од 47,6 степени, измерен во Ла Рамбла кај Кордоба во август 2021 година.

Главна причина за екстремната жештина е подрачјето со висок воздушен притисок над југозападна Европа, кое го задржува врелиот воздух блиску до површината. Жешкиот бран ќе се прошири и кон јужна Франција, каде што температурите би можеле да се приближат до 40 степени.

Расте опасноста од пожари

Проблем ќе претставуваат и топлите ноќи, бидејќи на некои места минималните температури нема да се спуштат под 25 степени. Таквите услови го отежнуваат опоравувањето на организмот и го зголемуваат ризикот за постарите лица, децата, хронично болните и луѓето кои работат на отворено.

Поради сушата, ниската влажност и ветерот, опасноста од пожари е подигната на највисоко ниво во повеќе региони. Шпанија веќе се соочува со големи пожари, а најголемиот годинава во провинцијата Гвадалахара зафати повеќе од 26.000 хектари и доведе до евакуација на над 1.000 жители.

Жештината ќе предизвика дополнителен притисок врз земјоделството, резервите на вода и електроенергетскиот систем поради зголеменото користење клима-уреди. Според прогнозите, екстремно високите температури ќе продолжат најмалку до крајот на работната седмица.