(ВИДЕО) БЕЛАТА КУЌА ЛАНСИРА „ТРАМП ТВ“: 24-часовен канал на YouTube со говори и снимки од администрацијата

ТРАМП ТВ емитува содржини од администрацијата

Белата куќа го лансираше „Трамп ТВ“, 24-часовен YouTube канал на кој се емитуваат говори, снимки и други моменти поврзани со администрацијата на американскиот претседател Доналд Трамп. Емитувањето започнало во понеделник во 19 часот со говорот на Трамп на планината Рашмор од 3 јули, како дел од програмата „Trump TV: The Essentials Station“. Според описот на каналот, целта е на едно место да се прикажуваат најважните видеа, клучни говори и моменти од администрацијата, со емитување 24 часа дневно и ажурирање во реално време. Каналот е достапен и преку официјалната веб-страница на Белата куќа, каде што видеото е означено како „White House Live“.

Лансирањето предизвика реакции

Лансирањето на каналот следува по спорот меѓу администрацијата на Трамп и дел од медиумите околу пристапот на новинарите во Белата куќа. Демократскиот гувернер на Калифорнија, Гевин Њусом, го критикуваше потегот и го спореди со државна телевизија, додека поранешната претседателка на Здружението на дописници од Белата куќа, Веиџија Џијанг, истакна дека во САД нема државен медиум и ја нагласи важноста на независното новинарство.