Македонија
Дознај прв
(ВИДЕО) „КАЈ И ДА СИ, ЗА ПЕТРОВДЕН ВО ОХРИД ДА СИ“: Денес се одржува традиционалната староградска пловидба
Денес во Охрид се одржува традиционалната староградска пловидба „Ој љубов, љубов“ по повод Петровден, со учество на ВИС „Билјана“ и десетици пловни објекти.
Денес, на празникот Петровден, во Охрид се одржи традиционалната староградска пловидба „Ој љубов, љубов“, во организација на Културолошката иницијатива „5 до 12“. Настанот, кој со години е препознатлив симбол на охридската традиција, повторно ги обедини љубителите на староградската музика и убавините на Охридското Езеро.
Пловидба со староградски песни
Собирот на пловните објекти беше закажан за 17:30 часот кај плажата Канео, од каде учесниците започнаа пловидба исклучиво со веслање. Атмосферата ја збогати ВИС „Билјана“, кој изведува познати охридски и македонски песни додека колоната се движи кон Старото пристаниште (Островче).
Од 18:30 часот програмата можеа да ја проследат и посетителите од копно, каде традиционално се собираат голем број охриѓани и туристи.
Апел за безбедност
Организаторите упатуваа апел да не се користат пиротехнички средства, а моторните пловни објекти да се движат подалеку од веслачите и кајчето со ансамблот. За безбедноста се грижеа редари, Езерската полиција, Капетанијата на пристаништата и Црвен крст Охрид.
Настанот е дел од програмата „Бесконечниот круг на културата“ и секоја година привлекува бројни посетители, потврдувајќи ја традицијата содржана во познатата порака: „Кај и да си, за Петровден во Охрид да си“.
