14-ГОДИШНИК ОСОМНИЧЕН ДЕКА ОД ДЕДО МУ ОДЗЕЛ 17.300 ЕВРА: Мајката е приведена

Полицијата привела 36-годишна жена од Демир Капија по пријава дека нејзиниот 14-годишен син одзел околу 17.300 евра од домот на својот дедо. Случајот бил пријавен на 22 јули од 68-годишен жител, по што полициски службеници од ОВР Неготино презеле мерки за негово расчистување. Според пријавата, малолетникот наводно ги зел парите од домот на својот дедо и ги однел кај неговата мајка. Дедото навел дека момчето постапило под влијание на мајката.

Малолетникот разговарал во присуство на адвокат

За случајот биле известени јавен обвинител и Центарот за социјални работи. Разговорот со 14-годишникот бил извршен во присуство на адвокат за малолетници, во согласност со законските процедури. Полицијата продолжила со преземање активности за утврдување на потеклото и движењето на парите.

По расчистувањето ќе следува пријава

Од МВР информирале дека 36-годишната жена била задржана во полициска станица. По целосното документирање на случајот, против неа ќе биде поднесена соодветна пријава. Надлежните продолжуваат да ги утврдуваат сите околности поврзани со одземањето на парите.